Uno ruso

Eï uno vieillo histoiro. Pinsa véïré Ugèno aï tout djusté vingt à cinq ans. Notre hommé, pardi anavo véïré mïo et la mïo éro la Rosalie. Un djour, Ugéno se décidé à trouva lou péïré de la damésello et tout bounnamint li demandé la man de sa fillo. Lou péro Victor coummo l’appelavan aï un paou de bien : uno grandgeounno de quatré vatchas et aï pinsa per sa Rosalie à un aoutré parti un paou mieux ritché que l’Ugéno qué, lou paouré, aï djusté sous dous bras. Et ma fé, la Rosalie fugué refusa à notre galant. Ah ! mais l’Ugéno li teni à sa mïo (a bien sûr inqueu tchandgea d’idéïo) et tchertché tcherché coummo pouéri bien se débrouillia per arratcha lou counsintamint do péro Victor. Et à forço de tchertcha l’idéïo li vingué.

Aussi bé, un mé après inviroun l’Ugéno, se présinté de nouvé à la maisou de la Rosalie. Lou péro Victor lou fagué asséta et li païé mêmo un mourcé de pan et un bon canou. L’Ugéno parlé pas du tout de la Rosalie, fagué coummo si aï oublia lou refus do péro Victor et sa mïo. Bavardéran, beguéran un aoutré litré, casséran un aoutro croûto et à la neut. L’Ugéno partigué sans mêmo regarda la Rosalie. Pamin aï lou souriré.

Belléou uno houro après, la mèro Victor vegué pindoula darri la porto lou pardessus de l’Ugéno. L’examiné de près. Ero un djolié pardessus, un pardessus quasi de moussieu. Té, té se digué la vieillo eï belléou pas si paouré qu’aco lou bougré. Ou savez toutés, la fénao sount curiousas et ma fé la man de la méro Victor fagué lou tour de toutas la potchas. Et bé, créïez-vous ou lou créïez pas, un gros portofeillio gounflavo la faousso potcho. Bien sûr la méro Victor auri pas dopu l’ubri aquellé portofeillio. Mais, bouta-vous à sa plaço, éro plus maîtresso de sous déïgts. Quant agué visita tous lous coins do portofeillio se bouté à binla :

« Victor, Victor, véné vité. Anin dépatcha té ». Et quand Victor fugué arriva, sa féno li bouté sous lou na cinq billis de millos francs.

« Et bé moun ami a fa un djolli cop de refusa la Rosalie à l’Ugéno. Lou créïa paouré. Eï ritché. Lou portofeillio et lou pardessus sont sios. Surtout n’in disé ré à dingu et tatcho mouyen d’essé per aqui quand l’Ugéno vindro carré soun pardessus et arrindgearin l’affaïré.

L’Ugéno tourné Ah ! créïé mé, fugué bien reçu. La méro Victor sourtigué sa djolias assiéttas, fagué couéré uno omeletto de las mieux réussias, intamené la grosso saucisso et tout et tout… Lou péro Victor mounté de la cavo uno, douas, très bounnas bouteillas. Et la Rosalie què sa méré aï bouta au courant, éro touto sourirés.

Et ma fé, lou mariadgé fugué décida aquellé vêpré.

Quand, uno féï marias, Rosalie racounté l’histoiro do pardessus et demandé de palpa lous cinq billis de millos francs, l’Ugéno li répoundé simplamint qu’aï imprunta lou pardessus à un de sous amis.

Si bêtio que siatché Rosalie deviné bé touto l’histoiro et s’estimé roula coummo lou père et la méro Victor. A djamais perdounna.

Lou Drôlé

Journal de Tournon et d’Annonay | 14 11 1937

UNA RUSA

Es una vièlha istoara. Pensatz veire Usèna aiá tot juste vinta-cinc ans. Nòstre òme, pardi anava veire mia e la mia èra la Rosalie. Un jorn, Ugèna se decidèt a trovar lo paire de la damesèla e tot bonament li demandèt la man de sa filha. Lo pèra Victòr coma l’apelavan aiá un pauc de bien : una granjona de quatre vachas e aiá pensat per sa Rosalie a un autre partit un pauc miès riche que l’Usèna que, lo paure, aiá juste sos dos braç. E ma fe, la Rosalie fuguèt refusaa a nòstre galant. A ! mè. L’Usèna li teniá a sa mia (a bien sur encuèi chanjat d’idèa) e cherchèt cherchèt coma poiriá bien se desbrolhar per arrachar lo consentament dau pèra Victòr. E a fòrça de cherchar l’idèa li venguèt.

Aussiben, un mes après environ, l’Usèna se presentèt de novèl a la maison de la Rosalie. Lo pèra Victòr lo faguèt assetar e li paièt mèma un morsèl de pan e un bòn canon. L’Usèna parlèt pas du tot de la Rosalie, faguèt coma si aiá obliat lo refús dau pèra Victòr e sa mia. Bavardèran, beguèran un autre litre, cassèran una autra crosta e a la nuèt l’Usèna partiguèt sans mèma regardar la Rosalie. Pasmens aiá lo sorire.

Benlèu una ora après, la mèra Victòr veguèt pendolar darrièr la pòrta lo pardessús de l’Usèna. L’examinèt de près. Èra un jòlie pardessús, un pardessús quasi de monsièr. Tè, tè, se diguèt la vièlha es benlèu pas si paure qu’aquò lo bogre. O savètz totes, las femnas son curiosas e ma fe la man de la mèra Victòr faguèt lo torn de totas las pòchas. E ben, creètz-vo o lo creètz pas, un gròs pòrtafuèlha gonflava la faussa pòcha. Bien sur la mèra Victòr auriá pas dauput l’ubrir aquele pòrtafuèlha. Mè, botatz-vos a sa plaça, èra plus mestressa de sos dets. Quand aguèt visitat tots los coèns dau pòrtafuèlha se botèt a benlar :

« Victòr, Victòr, vène viste. Anem despacha-te ». E quand Victòr fuguèt arrivat, sa femna li botèt sos lo nas cinc bilhets de mila francs.

« E ben mon amic as fat un jòli còp de refusar la Rosalie a l’Usèna. Lo creiás paure. Es riche. LO pòrtafuèlha e lo pardessús son sieus. Surtot ne’n dises ren a dengú e tacha moien d’èsser per aquí quand l’Usèna vendrà quarre son pardessús e arrenjarem l’afaire.

L’Usèna tornèt. A ! creètz-me, fuguèt bien reçut. La mèra Victòr sortiguèt sas jòlias assietas, faguèt coire una aumeleta de las miès reüssias, entamenèt la gròssa saussissa e tot e tot… Lo pèra Victòr montèt de la cava una, doas, tres bonas botelhas. E la Rosalie, que sa maire aiá botaa au corrant, èra tota sorires.

E ma fe, lo mariatge fuguèt decidat aquele vèspre.

Quand, una fes mariats, Rosalie recontèt l’istoara dau pardessús e demandèt de palpar los cinc bilhets de mila francs, l’Usèna li respondèt semplament qu’aiá empruntat lo pardessús a un de sos amics.

Si bèstia que siache Rosalie devinèt ben tota l’istoara e s’estimèt rolaa coma lo pèra e la mèra Victòr. A jamai perdonat.

Lo Dròlle

Journal de Tournon et d’Annonay | 14 11 1937

occitan.org