St-Mathieu-d’Ardèche
Déman plaouro ! — Hier aou souer, vès los quatre ouros, passavé per hasar, en moun cousi davon l’escolo coumunalo dé fillos dé Sen-Mathiéou.
Tout en d’un cop moun cousi s’arresto, escouto un moument, et pièi mé dit : « Tè ! déman plaouro ». Dé suito iéou regardé én Barré per veiré sé lous nivous mountavou : n’iaviè pas jès. Coumo diablés counéissés qué déman plaouro ? yé diguère Escouto !… entendés pas los reynettos qué chantou ?… és pas los reynettos qu’entendès, simplé qué siès ! Vèsés pas qu’aco és los drolos qué font lo prièro. Escoutèn un paou maï. Eh bè ! mé diguè, moun cousi, nous sén troumpa toutés dous Entend ! « Aux aaarmes, citoyens ; formez vos bataillons ! » En éffet, à fouorço dé presta l’aourelïo finiguén per coumpréné qué chantavou lo Marselliéso
Oh ! pétard dé pétard ! quonto Marselliéso !! Coumo t’estroupïavou aco ! Sé lou paouré Rouget dé l’Isle aviè entendu aco sé sarié ana escoundré ou bélèou aouriè pas pougu dévina dé qué chantavou.
Bravos mèros dé famillos qué sès érousos d’avèdré dé fillos qué chonton tant bien ! Ou saré bé maï encaro à vosté liè dé mouort quon, o lo plaço d’uno prièro o la Sento Viergio per vous ajuda o suppourta vostos souffrenços, vostos droulettos sé mettront o gula o vostos aourelïos : « Aux aaarmes, citoyens ! »
Vous mondé toutos mos félicitaciéou et vous souhaité lou bonsouer.
Adiéou sia, mé voou jaïré.
La Croix de l’Ardèche | 17 04 1904
Deman plourà ! — Ièr au soèr, vèrs las quatre oras, passave per azard, emb mon cosin davant l’escòla comunala de filhas de Sent Matieu.
Tot en d’un còp mon cosin s’arrèsta, escota un moment, e puèi me ditz : « Tè ! deman plòurà ». De suita ieu regarde en Barre per veire se los nívols montavon : n’i aviá pas ges. Coma diables coneisses que deman plòurà ? Ié diguère : « Escota !… entendes pas las rainetas que chanton ?… es pas las rainetas qu’entendes, simple que siás ! Veses pas qu’aquò es las dròllas que fan la prièra. Escotem un pauc mai. E ben ! me diguèt, mon cosin, nos sem trompat totes dos. Entend ! : « Aux aaarmes, citoyens ; formez vos bataillons ! » En efet, a fòrça de prestar l’aurelha finiguem per comprene que chantavon la Marselhesa.
Ò ! petard de petard ! quanta Marselhesa !! Coma t’estropiavon aquò ! Se lo paure Roget de l’Isle aviá entendu aquò se sariá anat escondre o benlèu auriá pas pogut devinar de que chantavon.
Bravas mèras de familhas que sètz erosas d’avèdre de filhas que chanton tant bien ! O saretz ben mai encara a vòste lièch de mòrt quand, a la plaça d’una prièra a la Senta Vièrja per vos ajudar a suportar vòstas sofrenças, vòstas drolletas se metràn a gular a vòstas aurelhas : « Aux aaarmes, citoyens ! »
Vos mande totas mas felicitacions e vos soète lo bònsoèr.
Adieu-siatz, me vau jaire.
La Croix de l’Ardèche | 17 04 1904
© Denis Capian, 2013
occitan.org