Gazette d’Annonay | 16 05 1908
Bravò !!!
Paura Mainaas, me grondètz pas tròp ni me disètz pas tròp de mau si vos ai pas escrit una letra, dissandes passat, par vos felicitar de las eleccions.
L’èro pas bien, e d’un pauc mai mas dolors z’alavon m’empachar de vautar, mi que vos z’aiáu tant recomandat de pas mancar. Si mon brave vesin m’aiáu pas acompanhat, en me donant lo braç, l’èro pas fotut de grempar jusca la maison de vila par ramplir mon devoar de citoièn.
Anfèn, iaüra quò vai un pauc miès. Mè vosautres aussi, Mainaas, avètz bien fait vòstre devoar. Òl avètz comprés ce que vos disiáu lo darrèit còp — qu’èra la pura veritat — e fotut un bon còp de pompa a tot quelo monde de París que voliá, de fòrça, s’aucupar de veaas que nhòs regardavon pas. Òl avètz bien travalhat e fau esperar iaüra que nos fotràn la pès.
E oai, las eleccions se son bien passaas, sens bruit, e si qu’es estat funit un pauc tard, tot lo monde a pogut durmir lo restant de la nuèit. Mè si qu’èra estat ielis que sièzen estat nommats, ò ! Mainaas, l’auriatz entendut la retrèta e lo bocan qu’il aurián fait diens las ruas vos auriá saurtit l’envea de durmir. Erosament òl avètz agut l’eime de bien vautar e l’avem pas agut la pena de nhi revenir la diumencha après.
Vos ne’n fau tots mos compliments, e los autris còps tacharitz de ne’n faire autant.
*
Diens tot iquò, ce que me fai lo miès rire, qu’es de veire la paura Iauta-Ardecha de dissandes, venir nos dire que si sos amics son estat batuts, qu’es l’argent que n’es la causa. Siáu bien sur, Mainaas, que parona vos a ren aufèrt ni ren donat, puèi siètz pas d’iquelis que vendon nhòs voès. Par mon compte, mi òl ai pas reciauput un çantime. Qu’es pas ce que nos a empachat de bien vautar. Au contraire !
Mè, dau moment que la Iauta-Ardecha meta l’argent en avant, fariá bien miès de nos explicar coma son estat empleats los mila francs que Boissy a donats par faire venir vautar los electèrs que se trovavon a Grenòble, Lion, St Estiène, Riva de Gièr, etc… Lo sandes soar, velha de las eleccions, tots los trens ne’n amenavon. Pasmens, qu’es de monde que se desplaçon pas facilament. Probablament a faugut que l’òm nhòs paie lo voiatge, la norritura e la petita pieceta par dessús.
Avant de parlar daus autris sens ren saver, la Iauta fariá bien de se metar la man sus la tèsta e gaitar si l’a ren a se resproschar. Tot lo monde, en vila, raconta quela istoara daus mila francs de Boissy e iela ne’n parla pas. Zò sap ben, la mastina, mè òl prefèra acusar los autris.
*
Faudriá pasmens nos entendre sus una autra veaa. Quelo jornal nos raconta aussi, que qu’es bien triste de veire una vila republiquèna coma la nòstra vautar d’iquela façon. Coma dònc ! Par asard, nhi aiá que ielis de republiquèns aicí ? Zò creo pas.
Si òl aián que nhòs Republica, que demanda lo desòrdre, la guèrra diens chasca comuna e las finanças au gaspilhatge, sarián bograment a plendre ; mè n’i a una autra plus genta par iquekis que vòlan l’òrdre, l’union, la bona fraternitat e que las veaas marchen de dreit.
Vequià las doas sòrtas de Republica que mi coneisso. Siáu pas lo solet, Mainaas, a pensar coma iquò. Vosautris aussi, puisque sus las doas listas republiquènas onte deviatz chausir tots vòstris conselhièrs, òl avètz pres los melhors, los plus tranquilles, los plus capables, anfèn quelis que charjaràn de faire de bon travalh au liè de pèrdre nhòs temps a faire la guèrra a Pière o a Pòl.
Òl avem bien travalhat. Ma figa, iaüra, tant pis si quò fai pas plesir a la Iauta-Ardecha. Mè n’empacha pas que siem de republiquèns e que nòstra Republica es plus genta e plus frescha que la sieu. La conservarem bien.
Sus iquò, Mainaas, adessiatz. Laissètz-me repausar quauque temps par funir de me remetre de mas dolors.
- P. F.
Gazette d’Annonay | 16 05 1908
© Denis Capian, 2025
occitan.org